Ձեր վստահելի աղբյուրը

Ադրբեջանի զինվորականների ու քաղաքական գործիչների շարքերում քիչ չեն կոշտ ճանապարհների կողմնակիցները, որոնք փորձում են հրահրել նախագահ Իլհամ Ալիևին դեպի ուժային տարբերակը: Այս մասին ռուսական «Կոմմերսանտ» թերթին հայտարարել է անանուն եվրոպացի բարձրաստիճան դիվանագետը, որը մասնագիտացած է Հարավային Կովկասի խնդիրների հարցում՝ մեկնաբանելով Ադրբեջանի զինված ուժերի կողմից Լեռնային Ղարաբաղում խոցված ռազմական ուղղաթիռի միջադեպը:

«Նրանք հույս ունեն, որ միլիարդավոր նավթադոլարները, որ Բաքուն ծախսում է զինված ուժերի ամրապնդման համար, թույլ են տվել փոխել ուժերի հավասարակշռությունը, և թե կարելի է հույս ունենալ ռևանշի 1990-ականների սկզբի պատերազմում պարտվելուն ի պատասխան: Եթե մարտական գործողությունները վերսկսվեն, ապա դրանք առավել կործանիչ կլինեն տարածաշրջանի, այդ թվում՝ ադրբեջանական նավթարդյունաբերության համար»,- նշել է նա:

Ըստ աղբյուրի՝ արդյունքում ռազմական նպատակներին հասնել այնուհանդերձ ամենայն հավաականությամբ չի ստացվելու, և հետևանքը կարող է լինել Ադրբեջանում իրավիճակի ապակայունացումը:

«Իլհամ Ալիևը հասկանում է դա ու հնարավորություն կգտնի լարվածության վերացման համար՝ թույլ չտալով, որպեսզի շփման գծում միջադեպը հանգեցնի լայնամասշտաբ պատերազմի»,- ընդգծել է եվրոպացի դիվանագետը:

Հիշեցնենք, որ Արցախի Պաշտպանության բանակի մամուլի ծառայության փոխանցմամբ` նոյեմբերի 12-ին` տեղական ժամանակով ժամը 13:45-ի սահմաններում, շփման գծի արևելյան հատվածի օդային տարածքում Ադրբեջանի ԶՈւ-ի կողմից հրադադարի ռեժիմի խախտման պատճառով խոցվել է Արցախի ՌՕՈւ Մի-24 ուղղաթիռ, որն ուսումնամարզական թռիչք էր կատարում: Այն տարածքը, որտեղ արձանագրվել է միջադեպը, շփման գծին բավականին մոտ է: Հակառակորդը միջադեպից հետո շարունակել է տարբեր տրամաչափերի զենքերից ինտենսիվ կերպով կրակ բացել միջադեպի վայրի ուղղությամբ:

Միևնույն ժամանակ, ՀՀ ՊՆ մամուլի քարտուղար Արծրուն Հովհաննիսյանն իր ֆեյսբուքյան էջում գրել է, որ Արցախի հետ սահմանային հատվածում Ադրբեջանի ԶՈւ-ն աննախադեպ սադրանք իրականացրեց, որը հանգեցրել է նաև իրավիճակի սրմանը, իսկ ադրբեջանական կողմի հնարանքները, թե իբր հայկական ուղղաթիռներն իրենց դիրքերի ուղղությամբ հարձակման փորձեր են արել, ու իբրև թե իրենք էլ միայն պատասխանել են այս քայլին, անհեթեթ են:

«Ուղղաթիռի բեկորների ուսունասիրությունը թույլ կտա հաստատել, որ ուղղաթիռը զինված չի եղել: Իրավիճակի այս լարումը ադրբեջանական կողմից շարունակվում էր, երբ ուղղաթիռը արդեն ընկած էր: Ավելին, ադրբեջանական կողմի կրակահերթը նաև թույլ չէր տալիս, որ անգամ օդաչուներին մոտենան: Այս աննախադեպ լարման հետևանքներն ադրբեջանական կողմի համար շատ ցավոտ կլինեն և կմնան Ադրբեջանի ռազմաքաղաքական ղեկավարության խղճին: Ուղղաթիռի հրամանատարն էր մայոր Սերգեյ Սահակյանը: Անձնակազմի հետագա ճակատագրի մասին տեղեկություններ կհայտնենք»,- նշել է Արծրուն Հովհաննիսյանը:

Նյութեր թեմայի շուրջ
ԼՂՀ ՊՆ. Իրադրությունն առաջնագծում լարվել է
Սահմանին լարված իրավիճակն առայժմ հնարավորություն չի տալիս մոտենալ խոցված ուղղաթիռին. Ա. Հովհաննիսյան
Կատարվածը ադրբեջանական վարչակազմի ձեռքի գործն է. Ֆրանսուա Ռոշբլուան
ԱՄՆ-ն անհանգստություն է հայտնել ԼՂՀ-ում խոցված ուղղաթիռի առնչությամբ